الجزيرة الوسطية بقت من أكتر الحاجات اللي الناس بتطلبها في المطبخ المودرن، خصوصًا مع المطبخ المفتوح على الصالة. بس لو اتعملت في مكان مايستحملهاش هتبقى عائق بتلف حواليه طول اليوم. هنقولك هنا إمتى الجزيرة تنفع، ومقاساتها، وإزاي تستغلها صح.
الصور اللي في المقالة من مطابخ اتسلّمت ومن معارض بن صبري.
يعني إيه جزيرة وسطية؟
الجزيرة وحدة مطبخ قايمة لوحدها في النص، مش لازقة في أي حيطة، وتقدر تلف حواليها من كل ناحية. أما شبه الجزيرة أو البار فلازق في طرف المطبخ من ناحية واحدة، وده حل أوفر في المساحة. والجزيرة غالبًا بتكون قلب المطبخ الأمريكي المفتوح، لأنها بتفصل المطبخ عن الصالة من غير حيطة.
مطبخك يستحمل جزيرة؟
أهم رقم هنا هو الممر: سيب حوالين الجزيرة مسافة لا تقل عن ١٢٠ سم من كل ناحية، عشان تتحرك براحتك وتفتح الأدراج وباب الفرن وغسالة الأطباق من غير ما تتزنق.
احسبها كده: عمق الوحدات اللي على الحيطة حوالي ٦٠ سم، وبعدها ممر ١٢٠ سم، وبعدها عمق الجزيرة، وبعدها ممر تاني ١٢٠ سم. يعني حتى أصغر جزيرة محتاجة حوالي ٣٦٠ سم من الحيطة. لو المساحة أقل من كده، شبه الجزيرة أو سطح شغل زيادة على الحيطة هيبقى أعملي، ودي من أشهر غلطات تفصيل المطابخ.
مقاسات الجزيرة
- العمق: من ٦٠ لـ ٩٠ سم حسب الاستخدام.
- الارتفاع: نفس ارتفاع سطح الشغل، من ٨٥ لـ ٩٠ سم، ولو هتستخدمها بار بكراسي عالية بتتعمل أعلى.
- القعدة: سيب بروز للسطح لا يقل عن ٢٥ لـ ٣٠ سم عشان الرجلين، وحدد عدد الكراسي قبل ما تحدد الطول.
باقي مقاسات المطبخ كلها في دليل مقاسات المطبخ القياسية.
هتستخدمها في إيه؟
الاستخدام هو اللي بيحدد التصميم:
- سطح تحضير: أبسط استخدام وأريحه، سطح فاضي قريب من الحوض والبوتاجاز، بشرط إنها ماتقفش في طريقك بينهم.
- قعدة للفطار: بروز السطح من ناحية الصالة بيخلّيها مكان للأكل السريع وقعدة العيلة وإنت بتطبخ.
- تخزين: أدراج واسعة من ناحية المطبخ للحلل والأطباق، وضلف أو رفوف من الناحية التانية.
وجوه الجزيرة ممكن يتحط كمان إكسسوارات زي الكارجو اللي بيطلع لبرّه، زي الجزيرة اللي في معرض ذا يارد مول.
حوض أو بوتاجاز في الجزيرة؟ ممكن، بس محتاج مياه وصرف، أو غاز وكهربا وشفاط في السقف فوقها، توصل لنص المطبخ. ده لازم يتحدد في المعاينة قبل الأرضيات، مش بعد التشطيب. وفي كل الأحوال فيشة كهربا في الجزيرة بتفرق جدًا مع الأجهزة الصغيرة.
الشكل والإضاءة
الجزيرة ممكن تبقى بنفس لون المطبخ، أو بلون أو خامة مختلفة فتبقى هي نقطة التركيز. وفيه اللي بيحب السطح ينزل لحد الأرض من الجنبين. وتقدر تختار من الخامات الخمسة: ألفيك وسينوسان والبولي لاك (لامع بس) وإتش بي إل وأركوبا، والفرق بينهم في مقارنة خامات المطابخ.
والإضاءة بتكمّل الشكل: نجف معلّق فوق الجزيرة بينوّر سطح الشغل، وشريط إضاءة تحتها بيدّيها شكل كأنها طايرة. واختار الألوان مع الإضاءة دي، زي ما شرحنا في إزاي تختار لون المطبخ حسب الإضاءة.
شوف الجزيرة على الطبيعة
أحسن طريقة تحس بيها بالمقاسات إنك تجرّب الممر والقعدة حوالين جزيرة حقيقية في معارضنا، وبعدها المهندس بيحطها في تصميم ثلاثي الأبعاد لمطبخك قبل التنفيذ.
- معرض ذا يارد مول في التجمع الأول
The YARD Mall, G32 - معرض مصر الجديدة
Ard Al Golf, Beside Almaza Central - معرض حدائق الأهرام
Second gate beside Al Hoda Pharmacies - معرض دائري القطامية
Ring Road Mall
قالوا عنا
عملاء بيحكوا عن التصميم والتفاصيل في مطابخهم:
أسئلة شائعة عن جزيرة المطبخ
الجزيرة تنفع في مطبخ صغير؟
غالبًا لا، لأن الممر حواليها هياكل المساحة. البديل شبه جزيرة أو سطح شغل زيادة على الحيطة، وأفكار تانية في تصميم مطابخ صغيرة.
الجزيرة بتزوّد تكلفة المطبخ؟
أيوه، لأنها وحدات وسطح زيادة، والتكلفة بتتحدد حسب مقاسها وخامتها وإكسسواراتها. اعرف أكتر في إزاي بيتحدد سعر مطبخك.
الجزيرة عليها نفس ضمان المطبخ؟
أيوه، الجزيرة جزء من المطبخ، وكل مطابخ بن صبري عليها ضمان ١٠ سنوات.
عايز تعرف مطبخك يستحمل جزيرة وتكلفتها قد إيه؟ زور صفحة أسعار المطابخ.